Lög Íslensku kirkjunnar í Noregi

1.gr. Nafn og aðsetur

Íslenska kirkjan í Noregi er kristið samfélag þeirra sem skírðir eru eða fermdir innan kirkjunnar, og þeir meðlimir sem sjálfir skrá sig með norskri kennitölu. Hún er skráð hjá norskum yfirvöldum sem «Islandske kirken i Norge»

Íslenska kirkjan í Noregi er einn af söfnuðum íslensku Þjóðkirkjunnar og gilda lög hennar um söfnuðinn, presta hans og starfsmenn nema annað sé tekið fram í reglum þessum og svo fremi það stangist ekki á við norsk lög um trúfélög sem kirkjan annars fylgir.

Lögheimili kirkjunnar er í Ósló. Þar skulu aðalfundir safnaðarins haldnir, sóknarprestur safnaðarins hafa búsetu og skrifstofa safnaðarins vera.

2.gr. Aðalfundur

Aðalfundur fer með ákvörðunarvald safnaðarins í málum þeim sem undir fundinn heyra samkvæmt lögum eða lögmætum ákvörðunum.

Aðalfundur er vettvangur starfsskila og reikningsskila af hendi stjórnar kirkjunnar og einstakra nefnda á vegum safnaðarins. Þar skulu rædd málefni kirkjunnar, þar á meðal þau mál sem lögmælt er að undir fundinn séu borin.

Aðalfund skal að jafnaði halda fyrir maí lok ár hvert. Til hans skal boðað með fjögurra vikna fyrirvara. Aukaaðalfund skal halda ef meirihluti stjórnar safnaðarins óskar þess, eða 150 safnaðarmeðlima sem atkvæðisrétt hafa á safnaðarfundum.

Dagskrá aðalfundar:

1. Formaður setur fundinn og stjórnar kosningu fundarstjóra og 2 fundarritara

2. Fundarstjóri kannar hvort til fundar sé löglega boðað

3. Skýrsla stjórnar

4. Skýrsla sóknarprests

5. Fjárhagsáætlun og ársreikningar lagðir fram

6. Kosning í safnaðarstjórn og varastjórn

7. Tillögur

8. Kosning í kjörnefnd og aðrar nefndir

9. Önnur mál

Tillögur til aðalfundar skulu berast safnaðarstjórn fyrir 1. mars ár hvert.

Safnaðarmenn njóta kosningarréttar og kjörgengis á safnaðarfundum þegar þeir eru fullra sextán ára.

3.gr. Safnaðarstjórn

Stjórn safnaðarins er ásamt sóknarpresti í fyrirsvari fyrir söfnuðinn gagnvart stjórnvöldum,stofnunum og einstaklingum. Hún hefur umsjón með eignum safnaðarins og fjárhag.

Stjórn kirkjunnar annast rekstur og framkvæmdir á vegum safnaðarins og styður kirkjulegt starf í söfnuðinum ásamt prestum og starfsmönnum kirkjunnar.

Stjórnarmenn skulu kosnir til fjögurra ára í senn og skulu þeir koma úr röðum safnaðarmeðlima. Stjórn skiptir með sér verkum á fyrsta fundi eftir aðalfund. Formaður skal boða til funda.

Stjórnarmenn eru fimm. Til vara skulu vera þrír einstaklingar og taka þeir sæti í forföllum stjórnarmanna eftir þeirri röð sem þeir voru kosnir í. Heimilt er safnaðarstjórn að kveða varamenn sér til liðsinnis þegar hún telur ástæðu til.

Safnaðarstjórn tekur mið af starfsreglum Íslensku Þjóðkirkjunnar.

Safnaðarstjórn starfar einnig eftir siðareglum sem hún setur sér.

Fyrir stjórnarfundi og aðra vinnu þiggur safnaðarstjórn og varamenn þóknun sem samþykkt skal af aðalfundi. Þóknun til stjórnar fylgir almennri launavísitölu.

4.gr. Kjörnefnd

Aðalfundur kýs þriggja manna kjörnefnd. Kjörnefnd stingur upp á fólki til setu í safnaðarstjórn.

Kjörnefnd er kosin til fjögurra ára.

5.gr. Sóknarprestur

Sóknarprestur Íslensku kirkjunnar í Noregi er hirðir og leiðtogi safnaðarins og starfar við hlið stjórnar kirkjunnar.

Prestur gegnir prests- og predikunarembætti samkvæmt vígslubréfi sem og skipunarbréfi sem Biskup Íslands setur presti.

Heimilt er biskupi að skipa prest til starfa við hlið sóknarprests í samráði við sóknarnefnd/safnaðarstjórn, ef aðstæður gefa tilefni til.

Prestar safnaðarins eru þjónandi prestar íslensku Þjóðkirkjunnar og skulu lúta tilsjón íslenskra kirkjulegra stjórnvalda í kirkjulegum efnum.

Þegar sóknarprestsemætti losnar leitar safnaðarstjórn eftir því við Biskup Íslands að hann auglýsi embættið með minnst fjögurra vikna umsóknarfresti hið skemmsta.

Biskup Íslands staðfestir ráðningu sóknarprests og erindisbréf það sem Biskup setur honum í samráði við safnaðarstjórn.

6.gr. Breytingar á lögum

Breyting á lögum þessum öðlast fyrst gildi þegar tveir aðalsafnaðarfundir í röð hafa samþykkt óbreytta tillögu. Breytingartillögur skulu liggja frammi og vera aðgengilegar safnaðarmeðlimum eigi síðar en fjórum vikum fyrir aðalsafnaðarfund.

Ef söfnuðurinn leggst niður ganga eigur hans til Íslensku Þjóðkirkjunnar.

Lög þessi sem samþykkt eru á aðalsafnaðarfundi Íslenska safnaðarins í Noregi þann

4.október 2009 taka gildi nú þegar.

(Breytingar voru samþykktar á aðalfundi 26.apríl 2015 og voru staðfestar á aðalfundi 2016.)

(Breytingar voru samþykktar á aðalfundi 24.apríl 2016 og skulu staðfestar á aðalfundi 2017)

(Breytingar samþykktar á aðalfundi 2021 og framhaldsaðalfundi 2022)

(Breytingar samþykktar á aðalfundi 2024 og staðfestar á aðalfundi 2025 )