Fréttir

Sjómannadagsguðsþjónusta í Tromsø 2. júní 2019 kl. 15.00

Það hefur skapast hefð að standa fyrir sjómannadagsguðsþjónustu í Tromsø hvert ár á degi sjómanna. Þetta árið þá ber sjómannadagurinn upp á sunnudaginn 2. júní. Guðsþjónustan verður í Grønnåsen kirkju og hefst kl. 15.00. Kirkjan liggur við Dramsvegen 203. Sr. Arndís Ósk Hauksdóttir, prestur í Steinkjær, mun þjóna fyrir altari. Tónlistarflutningur verður í höndum Íslendingafélagsins sem og kirkjukaffið. Hvet alla Íslendinga í Tromsø og nágrenni til að fjölmenna til messu og hafa gaman af.

Skráning í fermingarfræðsluna fyrir veturinn 2019-2020 er hafin

Innritun fer fram á heimasíðu safnaðarins www.kirkjan.no (linkur á skráningareyðublað til hægri á heimasíðu).

Börn sem sækja fermingarfræðslu Íslenska safnaðarins þurfa að sækja 10 guðsþjónustur og sitja alls 10 fræðslufundi í Ólafíustofu. Fundirnir eru ávallt í tengslum við guðsþjónustur safnaðarins í Nordberg kirkju í Ósló. Fundirnir hefjast kl. 11.00 og guðsþjónustur kl. 14.00. Við tökum vel á móti foreldrum og öðrum fjölskyldumeðlimumsem fá leiðsögn um nágrenni Ólafíustofu meðan á fræðslu stendur.

Þau börn sem búa utan Óslóar og eiga ekki heimangengt vegna fjarlægðar munu fá möguleika til að vera virkir þátttakendur á öllum fræðslufundum í gegnum fjarfundarbúnað. Fundirnir eru sendir út og með aðstoð tækninnar eru samskiptin gagnvirk.

Auk fræðslufunda og guðsþjónusta verður öllum þátttakendum safnað saman 1-3 sinnum á árinu og yfir helgi.

Fyrsti fundur fermingarhóps næsta árs er sunnudaginn 12. maí kl. 11.00 í Ólafíustofu. Nánara fyrirkomulag fræðslunnar verður auglýst nánar síðar og skipulagt eftir búsetudreifingu þátttakenda.

 

Fermingardagar fyrir 2020  á vegum íslensku kirkjunnar í Noregi:

• Mánudaginn 1. júní kl. 14.00 (annar í hvítasunnu) í Nordberg kirkju í Osló.

• Sunnudaginn 28. júní kl. 12.00 í Seltjarnarneskirkju á Íslandi.

 

Aðrar dagsetningar og staðsetningar í Noregi eftir samkomulagi við presta íslensku kirkjunnar.

Aðalsafnaðarfundur 5. maí

Aðalsafnaðarfundur verður haldinn sunnudaginn 5. maí í Nordberg kirkju. Guðsþjónusta hefst kl. 14.00 og að henni lokinni hefst fundurinn í safnaðarheimilinu, en gert er ráð fyrir að sjálfur aðalfundurinn hefjist kl. 15:30. Hefðbundin aðalfundarstörf ásamt kosningum.

 

Dagskrá aðalsafnaðarfundar samkvæmt lögum safnaðarins:

a.  Formaður kannar hvort til fundar sé löglega boðað

b.  Kosning fundarstjóra og fundarritara

c.  Skýrsla formanns

d.  Stefna stjórnar

e.  Skýrsla sóknarprests

f.  Fjárhagsáætlun og ársreikningar lagðir fram

g.  Tillögur

h. Kosning í stjórn og aðrar nefndir.

i. Önnur mál

 

Skjöl er lögð verða fram á fundinum verða að finna hér á heimasíðunni, undir “Söfnuðurinn/Ársskýrslur”.

 

Undir lið h þarf að kjósa:

Stjórn Íslenska safnaðarins

– 2 í varastjórn (Kristján Daðason og Snorri Ásgeirsson ganga úr varastjórn)

 

Ólafíusjóður

– 2 í varastjórn Ólafíusjóðs (engir varamenn eru til staðar)

 

Nefndir

– 5 í listanefnd (endurvekja þarf nefndina)

– 2 í kjörnefnd (núverandi nefndarmeðlimir eru Sturla Jónsson og Rannveig María Gísladóttir)

– 2 innri endurskoðendur (núverandi innri endurskoðendur eru Þórhallur Guðmundsson og Ómar Diðriksson)

 

Framboð þurfa að hafa borist kjörnefnd fyrir 29. apríl.

Áhugasamir hafi samband við kjörnefnd safnaðarins: Sturlu Jónsson, formann nefndarinnar, í síma 905 68 173 eða Rannveigu Maríu Gísladóttir, í síma 905 51 583.

 

Um aðalsafnaðarfund segir m.a í 2.gr. laga safnaðarins:

• Aðalsafnaðarfundur fer með ákvörðunarvald safnaðarins í málum þeim sem undir fundinn heyra samkvæmt lögum eða lögmætum ákvörðunum.

• Aðalsafnaðarfundur er vettvangur starfsskila og reiknisskila af hendi stjórnar safnaðarins og einstakra nefnda á vegum safnaðarins. Þar skulu rædd málefni safnaðarins, þar á meðal þau mál sem lögmælt er að undir fundinn séu borin.

• Aðalsafnaðarfund skal að jafnaði halda fyrir maí lok. Til hans skal boðað með fjögurra vikna fyrivara.

• Aðra safnaðarfundi skal halda ef meirihluti stjórnar safnaðarins óskar þess, eða 150 safnaðarmanna sem atkvæðisrétt hafa á safnaðarfundum.

• Safnaðarmenn njóta kosningarréttar og kjörgengis á safnaðarfundum þegar þeir eru fullra sextán ára.

• Tillögur til aðalfundar skulu berast safnaðarstjórn á netfangið [email protected] fyrir 1. mars ár hvert. Tillögur sem berast eftir 1. mars verða ekki teknar til umræðu.

Þann 8. febrúar mun söfnuðurinn hefja TTT starf í Ósló.

TTT klúbburinn er fyrir tíu til tólf ára krakka. Fyrsta samkoman er áætluð þann 8. febrúar og svo í framhaldinu aðra hverja viku á föstudögum í Ólafíustofu kl. 17.30-19.00.  Þar er margt skemmtilegt gert m.a. leikir, föndur, fræðsla, helgistundir og fleira. Þetta verður leikandi skemmtilegur vetur!

Allir krakkar í 5 – 7. bekk eru velkomnir og þátttaka er ókeypis.

Umsjón hefur Jónína M Arnórsdóttir ásamt ungliðum úr æskulýðsstarfinu.

Fjölskylduguðsþjónusta kl. 14.00 sunnudaginn 3. febrúar í Nordberg kirkju

Í fyrstu atrennu er það okkur mikil ánægja að kynna til leiks fyrri umsækjandann um stöðu sóknarprests, Ingu Harðardóttur, sem er starfandi æskulýðsfulltrúi Hallgrímskirkju. Hún útskrifaðist með cand.theol gráðu frá Guðfræðideild Háskóla Íslands árið 2012 og var það sama ár ráðin til starfa í Hallgrímskirkju. Inga kom víða við á námsferli sínum og stundaði m.a. nám í myndlist og heimspeki áður en guðfræðin vann hug hennar allan. Hún söng einnig í Kór Menntaskólans við Hamrahlíð, Hamrahlíðarkórnum, og síðar Mótettukór Hallgrímskirkju, þar til hún hóf störf í kirkjunni.

Það hefur komið sér vel að hafa breiðan bakgrunn enda verkefnin fjölbreytt í kirkjulegu starfi en fyrir utan hefðbundið hópastarf barna og unglinga hefur Inga m.a. unnið ötullega að tónlistarstundum fyrir ungabörn sem kallast Krílasálmar og einnig séð um fermingarfræðslu fermingarbarna Hallgrímskirkju frá því að hún hóf störf þar. Inga útbjó einnig verkefnið Jólin hans Hallgríms fyrir jólin 2015, byggt á bók Steinunnar Jóhannesdóttur, þar sem skólabörnum er boðið að koma í heimsókn í í sögustund í Hallgrímskirkju á aðventunni. Það verkefni hefur slegið í gegn og hafa nokkur þúsund skólabörn notið þessara stunda í kirkjunni á aðventunni og er enn mikil aðsókn í ár.

Inga er gift Guðmundi Vigni Karlssyni, tónlistarmanni, og eiga þau þrjú börn.

Inga Harðardóttir mun þjóna fyrir altari í fjölskylduguðsþjónustu sunnudaginn 3. febrúar í Nordberg kirkju í Ósló. Hún byrjar daginn á að leiða fermingarfræðslu í Ólafíustofu áður en sjálf kirkjuathöfnin hefst. Að lokinni athöfn mun Inga kynna sig nánar fyrir krikjugestum og meðlimum safnaðarins í safnaðarheimili Nordberg kirkju. Jafnframt mun hún svara spurningum kirkjugesta ef einhverjar eru.

 

Fjölskylduguðsþjónusta kl. 14.00 sunnudaginn 7. apríl í Nordberg kirkju

Sr. Jóna Lovísa Jónsdóttir mun þjóna fyrir altari í fjölskylduguðsþjónustu í Nordberg kirkju sunnudaginn 7. apríl. Við munum kynna Jónu Lovísu til leiks þegar nær dregur guðsþjónustunni í apríl.

 

Hvetjum meðlimi til að fjölmenna til kirkju

Stjórn Íslenska safnaðarins vill hvetja sem flesta safnaðarmeðlimi til að fjölmenna til kirkju nú sem áður og þá sérstaklega til þessarra tveggja guðsþjónusta. Það er okkur mikið metnaðarmál og tilhlökkun að fá að kynnast umsækjendum betur enda lofa umsóknirnar góðu. Stöndum saman, verum virk og mætum til kirkju!

Tveir umsækjendur um stöðu ný sóknarprests

Stjórn Íslenska safnaðarins hefur í samvinnu við Biskupsstofu unnið að auglýsingu og ráðningarferli sóknarprests og hefur það skilað tveimur umsóknum, en umsóknarfrestur rann út þann 21. janúar. Eins og áætlanir gera ráð fyrir þá munum við vinna úr þessum umsóknum og vanda það ferli eins og kostur er. Umsækjendur um stöðuna eru þær Inga Harðardóttir, fræðslufulltrúi Hallgrímskirkju og sr. Jóna Lovísa Jónsdóttir, prestur í norsku kirkjunni.

Báðir umsækjendur munu fá tækifæri til að þjóna fyrir altari í Nordberg kirkju áður en lokaákvörðun verður tekin um hvor þessarra umsækjenda fái starfstilboð um stöðu sóknarprests. Í fyrstu atrennu mun Inga Harðardóttir þjóna fyrir altari sunnudaginn 3. febrúar í Nordberg kirkju og byrjar athöfnin kl. 14.00.

Stjórn safnaðarins reiknar með að ráðningarferlinu ljúki fyrir páska og niðurstaða liggi fyrir í lok apríl eða fyrir aðalfund þann 5. maí.

Staðgengill prests

Þann 1. janúar 2019 mun sr. Þórey Guðmundsdóttir taka við hlutverki staðgengils sóknarprests í fjarveru sr. Ragnheiðar Karítasar Pétursdóttur. Hlutverk Þóreyjar verður að sinna sáluhjálp og mun starfið fara að mestu í gegnum síma. Þórey mun sinna þessu veigamikla hlutverki fram að ráðningu nýs sóknarprests. Þórey tekur við símtölum milli kl. 10.00 – 11.00 mánudaga – fimmtudaga. Viljum við hvetja ykkur sem þurfa á stuðningi prests að halda að hafa samband við Þórey í síma +47 913 12 901. Þessi þjónusta verður í boði frá og með 7. janúar 2019.

Ráðning ný sóknarprests

Fyrir dyrum stendur leit að nýjum sóknarprest fyrir Íslenska söfnuðinn í Noregi. Við leitum eftir einstaklingi sem gæddur er þeim eiginleikum að vera fullur starfsorku, hafi reynslu af kirkjulegu starfi, reynslu af stjórnun, með góða skipulagshæfileika, jákvæðni og mikla færni í mannlegum samskiptum. Við metum mikils frumkvæði og hæfileika til að laga sig að fjölbreyttum en jafnframt krefjandi aðstæðum.

 

Stjórn Íslenska safnaðarins vinnur náið með Biskupsstofu Íslands að ráðningu nýs prests og er reiknað með að af ráðningu verði fyrir páska og að nýr prestur hefji störf ekki seinna en 1. ágúst 2019.

 

Að velja úr hæfasta einstaklinginn verður ærið vekefni en ætlun okkar er sú að hæfustu umsækjendurnir fái tækifæri til að láta ljós sitt skína með því að m.a. að þjóna fyrir altari í guðsþjónustu í Nordberg kirkju. Við í stjórn safnaðarins viljum deila þessari vinnu með safnaðarmeðlimum og væntum góðrar þátttöku, sem búsettir eru í Ósló og nágrenni, og brennið fyrir jákvæðu og uppbyggilegu safnaðarstarfi. Við hvetjum ykkur til að mæta til þessarra guðsþjónusta, sem verða auglýstar sérstaklega þegar þar að kemur, og taka virkan þátt í ráðningarferlinu ásamt valnefnd sem skipuð verður af stjórn safnaðarins í samvinnu við Biskupsstofu. Þetta verður án efa spennandi verkefni og væntum við þess að með dyggri hjálp ykkar þá verði sá hæfasti ráðinn til starfans.

Árið sem leið…

Tíminn frá byrjun maí hefur liðið hratt og breytingar hafa átt sér stað á meðal stjórnar og starfsfólks Íslenska safnaðarins í Noregi. Ný stjórn tók til starfa eftir langan og erfiðan aðalfund þann 6. maí og boðaði til framhaldsaðalfundar 29. maí í Ólafíustofu.

 

Eitt af fyrstu og brýnustu verkefnum nýrrar stjórnar var endurskoðun á fjárhagsáætlun þessa árs þar sem upphaflega var gert ráð fyrir taprekstri upp á 1,5 milljón nkr. Í fyrstu atrennu komumst við að þeirri niðurstöðu að erfitt væri að forðast tap og því mun mikilvægara að endurskoða og lækka alla útgjaldaliði, nálgast núllið og niðurstaðan af þeirri vinnu var rúm 300 þús nkr taprekstur. Það er okkur í stjórn mikill metnaður að reka Íslenska söfnuðinn réttu megin við núllið, vera meðvituð um og stilla starf safnaðarins eftir fjárhagsstöðunni hverju sinni.

 

Breytingar hafa orðið í starfsmannahaldi frá því í byrjun ársins og fyrst ber að telja að sr. Lilja Kristín Þorsteinsdóttir sagði upp stöðu sinni sem fræðslufulltrúi og prestur og réð sig til norsku kirkjunnar. Gerðir voru starfslokasamningar við Ingu Erlingsdóttur, starfskonu á skrifstofu safnaðarins, og sr. Ragnheiði Karítas Pétursdóttur, sóknarprest.

 

Formaður safnaðarins færði sig niður á gólfið og tók við stjórn og störfum Ingu í hálfu starfi og vinnur hörðum höndum þessa dagana við að leita að nýjum sóknarpresti í samvinnu við Biskupsstofu Íslands. Við leitum eftir einstaklingi sem gæddur er m.a. þeim eiginlekum að vera orkumikill, vel skipulagður og fær í mannlegum samskiptum. Hér þarf að vanda til verka og væntum við þess að geta boðið nýjum presti upp á starfsaðstæður sem þykja eftirsóknarverðar.

 

Í fjarveru sóknarprest höfum við leitað til sr. Þóreyjar Guðmundsdóttur um að taka að sér hlutverk staðgengils prests fram að ráðingu nýs prests (sjá aðra frétt). Það er okkur mikill heiður að jafn reyndur prestur og Þórey vilji aðstoða okkur og vera sóknarbörnum innan handar.

 

Nýtt fjármálakerfi

Vegna bágrar fjárhagsstöðu sl. tvö ár þá hefur stjórn safnaðarins gripið til ýmissa ráða við að ná tökum á útgjaldaliðum. Öll stjórnun fjármála hefur verið endurskipulögð og færð til nútímans en frá 1. janúar 2019 tökum við í gagnið nýtt fjármálakerfi sem mun auðvelda til muna allt eftirlit með fjárhagsstöðu safnaðarins.

 

Starfsfólk

Stærsti útgjaldaliðurinn er og verður áfram laun starfsfólks. Á nýju ári verða tveir starfsmenn í fullu starfi og rúmur tugur í hlutastörfum. Sú breyting hefur átt sér stað að allir starfsmenn fá skriflegan starfssamning sem greinir frá starfshlutfalli og starfslýsingu. Við teljum þetta vera mikilvægan lið í að ná upp aukinni skilvirkni og faglegri vinnu í starfssemi safnaðarins. Markmiðið er að skapa aukna meðvitund meðal starfsfólks fyrir fjárhag hverju sinni svo það verði meðvirkara í störfum sínum og hagi þeim í samræmi við fjárhagsstöðu og fjárhagsáætlanir.

 

Ólafíustofa

Rekstur húsnæðis safnaðarins hefur tekið breytingum. Sett hefur verið upp stýrikerfi vegna upphitunar húsnæðis og hitanum stýrt með svokölluðu appi. Við það fæst betri stjórn og yfirsýn sem auðveldar að lækka þann kostnað á ársgrundvelli. Þess má geta að í lok sumars greiddi söfnuðurinn tæpar 40 þús nkr bakreikning vegna húshitunar. Eitt af markmiðum nýrrar stjórnar er að opna Ólafíustofu enn meir en verið hefur og á þessu ári verður opið alla virka daga vikunnar milli kl. 09.00 – 14.30. Við óskum eftir að gæða Ólafíustofu meira lífi en verið hefur og mun stjórn safnaðarins vinna í þessa átt með nýjum presti.

 

Guðsþjónustur

Með ráðningu nýs prest munum við skipuleggja árið með það fyrir augum að ná til sem flestra Íslendinga óháð búsetu. Í venjulegu árferði gerum við ráð fyrir rúmum 30 guðsþjónustum víðs vegar um Noreg þar sem messað verður að jafnaði tvisvar í hverjum mánuð. Í dag búa rúmlega 9 þúsund Íslendingar í Noregi og þar af eru yfir 7 þús þeirra meðlimir í íslensku þjóðkirkjunni og þ.a.l. meðlimir í Íslenska söfnuðinum í Noregi.

 

Stjórn safnaðarins hefur skipt Noregi upp í 6 svæði. Eins og nærri má geta þá er fjölmennasta svæðið Oslo og nágrenni (Akershus og Østfold) sem telur 39% íslendinga. Næst fjölmennasta svæðið er vesturströndin frá Stavanger og norður til Álasunds eða 30%. 15% íslendinga búa í Vestfold, Telemark og Buskerud. Í suður Noregi eða Agder fylkjunum búa um 7% Íslendinga, 4% í Þrándarlögum og 6% norður af Þrándarlögum í Norður Noregi. Það verður töluverð en skemmtileg vinna við að ná til alls þessa hóps enda Noregur stórt landssvæði og tímafrekt yfirferðar. Okkar markmið er að byggja upp miðstöðvar á hverju svæði fyrir sig og byggja upp starfssemi sem verður sem líkust þeirri sem á sér stað í höfuðstöðvum safnaðarins í Ósló. Við lítum á alla Íslendinga sem okkar viðfangsefni og leggjum áherslu á að allir íslendingar haldi hópinn, gæti að upprunanum og sameiginlegri menningu okkar og taki virkan þátt í starfinu.

 

Fermingarbörn

Alls hafa 24 börn tekið virkan þátt í fermingarfræðslu vegna ferminga árins 2019. Fermingarfræðslan hefur farið fram í Ólafíustofu og þá í tenglsum við guðsþjónustur Íslenska safnaðarins í Ósló. Þau fermingarbörn sem búsett eru fjarri Ósló hafa fengið tækifæri til að vera virkir þátttakendur með aðstoð fjarfundarbúnaðar. Eins og gengur og gerist þá fylgir hverju fermingarbarni foreldrar og systkini og hefur formaður safnaðarins tekið að sér að hafa ofan af þessum fylgifiskum hverju sinni þegar fermingarbörnin hafa hist. Áætlað er að fermingarbörnin hittist 10 sinnum fram að fermingu en söfnuðurinn býður upp á fermingarguðsþjónustu í Ósló 10. júní 2019 og á Íslandi í Seltjarnarneskirkju þann 7. júlí.

 

Sivilombudsmannen

Eins og kom fram á síðasta aðalfundi þá rak Íslenski söfnuðurinn málarekstur gagnvart norska ríkinu með það fyrir augum að fá nýjum reglum um trúfélög (önnur en norsku kirkjuna) frá byrjun ársins 2016 hnekkt fyrir dómi. Þessi aðgerð var unninn í samvinnu við sænsku og finnsku kirkjurnar í Noregi. Málarekstrinum var skotið til Sivilombudsmannen og í stuttu máli þá dæmdi hann okkur í vil og hafa norsk yfirvöld fengið frest fram í miðjan janúar 2019 til að svara þeirri niðurstöðu. Við gerum okkur vonir um að endurheimta tölvuverða upphæð sem samsvarar þeim sóknargjöldum sem voru greidd út fyrir þessar reglubreytingar. Ef réttur skilningur er lagður í þessa niðurstöðu þá munum við endurheimta alla þá meðlimi sem voru skráðir í byrjun árs 2016 en jafnframt viðurkennir Sivilombudsmannen þá reglu að söfnuðurinn þarf að spyrja nýaðflutta íslendinga til Noregs, og eru meðlimir í íslensku þjóðkirkjunni, hvort þeir séu meðlimir í öðru trúfélagi.

 

Verkefni á döfinni

Með nýjum presti þá væntum við að færist meira líf í starfsemi Íslenska safnaðarins. Framundan er að hefja starf fyrir börn á aldrinum 10-12 ára (TTT) og að bjóða einnig upp á fullorðinsfræðslu. Við hvetjum þig lesandi góður að vera vakandi og fylgjast með hér á heimasíðu safnaðarins og Facebook.

 

Opinn fundur í Ólafíustofu 22. janúar kl. 19.00

Stjórn safnaðarins boðar til opins fundar í Ólafíustofu þar sem fólki gefst tækifæri á að fá betri innsýn í starfið og spyrja stjórn spjörunum úr og koma með tillögur sem gætu orðið til umræðu m.a. á næsta aðalfundi safnaðarins.

Ný persónuverndarlög (GDPR) tóku gildi frá 1. júlí 2018

Þann 22. júlí 2018 gekk í gildi ný reglugerð Evrópusambandsins um persónuvernd (GDPR) og varð að norskum lögum. Þessi reglugerð kom í stað eldri laga og reglna um persónuvernd og verndun persónuupplýsinga. Með nýrri reglugerð er sú nýlunda að allir meðlimir Íslenska safnaðarins í Noregi eiga rétt á að vita hvernig söfnuðurinn meðhöndlar persónuupplýsingar safnaðarmeðlima.

 

Íslenski söfnuðurinn í Noregi hefur ávallt lagt metnað sinn í að verja persónuupplýsingar meðlima sinna. Svo tryggja megi meðferð upplýsinganna þá höfum við tekið í notkun reglur um meðferð þeirra í samræmi við nýja lagasetningu.

 

Kvikni spurningar er þér velkomið að hafa samband við skrifstofu safnaðarins, senda tölvupóst á [email protected] eða hringja í +47 450 79 733.