10408794_10152162744796962_7667478683478588047_n

Kæru landar! Við þurfum þjóðarátak Íslendinga í Noregi

Blikur eru á lofti. Nú þurfum við að hjálpast að til að tryggja óskerta þjónustu Íslensku kirkjunnar við Íslendingasamfélagið hér í Noregi.

Hvaða breytingar hafa átt sér stað?

Norsk yfirvöld hafa ákveðið að meðlimir trúfélaga í Noregi þurfi héðan í frá að skrá sig sérstaklega í sitt trúfélag ellegar fái þau ekki lengur að njóta sóknargjaldanna sem norska ríkið greiðir út sem stuðning við okkar fjölbreytta safnaðarstarf. Að óbreyttu mun þetta kippa fjárhagsgrundvellinum undan þeirri víðtæku þjónustu sem Íslenska kirkjan veitir s.s. barna- og æskulýðsstarfi, fermingarfræðslu, eldri borgara starfi, sálgæslu, jarðarförum, giftingum, skírnum og svo framvegis.

Kostar þetta þig eitthvað?

Íslendingar búsettir í Noregi hafa hingað til ekkert þurft að greiða fyrir þá kirkjulegu þjónustu sem Íslenska kirkjan í Noregi veitir og þannig viljum við gjarnan hafa það áfram. Það er afar mikilvægt fyrir okkur öll að standa vörð um kirkjuna okkar og þá þjónustu um allan Noreg sem sóknarbörn eiga aðgang að á sínu móðurmáli.

Athugið! Að vera skráður í Íslensku kirkjuna í Noregi kostar ekkert og samkvæmt norskum lögum er enginn kirkjuskattur.

Hvernig fer ég að því að skrá mig í Íslensku kirkjuna í Noregi?

  • Það er hægt að skrá sig rafrænt í gegnum rafræna formið hér að neðan. Foreldar nota einnig rafræna formið til að skrá börnin sín í kirkjuna, börn fylgja ekki sjálfkrafa með skráningu foreldra.
  • Það er hægt að hringja á skrifstofuna okkar, sími: 22 36 01 40 á skrifstofutíma, mánudag-fimmtudag kl. 10-14. Þá sendum við staðfestingarbréf um að viðkomandi sé skráður í kirkjuna.
  • Það er hægt að senda tölvupóst á netfangið: [email protected], með nafni og kennitölu.
  • Það er hægt að senda SMS á símanúmerið 91 31 29 01 og gefa upp nafn og kennitölu.

Hverjir þurfa að skrá sig?

Allir sem hafa tilheyrt íslensku kirkjunni eða vilja tilheyra henni þurfa að skrá sig.

Með Guðs blessun og kærri þökk, prestar íslensku kirkjunnar í Noregi.